У вёсцы Смаляны, што ў Аршанскім раёне, рыхтуюцца прыняць раённыя Дажынкі. Вёска мае некалькі значных архітэктурных помнікаў і вялізную колькасьць старых будынкаў, хоць і не прызнаных помнікамі, але каштоўных сваёй гісторыяй, архітэктурай. Нават на кансэрвацыю помнікаў рэсурсаў бракуе, ня кажучы ўжо пра рэстаўрацыю.
Сьпярша зьнесьлі будынак мясцовага гатэлю, якому было больш за 100 гадоў. Пачаткова яго будаваў тутэйшы абшарнік як жылы дом для працаўнікоў маёнтку. А проста да жылога будынку прымыкаў будынак стайняў. У часы бальшавікоў ён выкарыстоўваўся як жытло.
Калі гатэль зьнесьлі, то будынак стайняў застаўся без адной сьцяны. У ноч з 30 чэрвеня на 1 ліпеня ўлады дабраліся і да стайняў. Раніцай мясцовыя жыхары ўбачылі на месцы будынку, якому больш за стагодзьдзе, толькі абломкі, піша orsha.eu.
Выданьне адзначае, што гэта чарговы акт барбарства ўладаў на Аршаншчыне. Цягам апошняга дзесяцігодзьдзя ўжо спрабавалі разбурыць былы манастыр дамініканаў, але тады разбурэньне спынілі з дапамогай Акадэміі навук. Летась зруйнавалі мясцовы ўнікальны млын, каштоўны сваім абсталяваньнем, а таксама зьнішчылі стары будынак мясцовага тэхнікуму.
Смаляны вядомыя з 1484 году. У вёсцы занядбанымі стаяць касьцёл Найсьвяцейшай Панны Марыі і кляштар дамініканаў, замак Белы Ковель, што належаў каралеве Боне Сфорцы, і іншыя будынкі. У вёсцы разам з сваімі сямейнікамі пахаваны выбітны беларускі паэт Тамаш Зан, які правёў апошнія гады жыцьця ў маёнтку Кахачыне непадалёк.
Форум