25 чэрвеня беларускія музычныя праекты Intelligency і «Саюз» выправяцца ў гістарычную мясьціну Смаляны на Аршаншчыне, каб наладзіць стрым у межах новага сэзону онлайн-фэстывалю VELO_ve Music Fest 2.0.
«У чацьвер гледачоў чакае сымбалічнае злучэньне гістарычнай эпохі і сучаснай музычнай культуры ва ўнікальным месцы. На фоне замкавага хараства і муроў старадаўняга храму ХVII стагодзьдзя ў Смалянах музыкі зайграюць свае найлепшыя трэкі», — апавядаюць арганізатары імпрэзы.
Пачне канцэптуальны стрым а 19-й гадзіне кааліцыя менскіх музыкаў з гурту «Саюз»: ад бразыльскай поп-музыкі 1970-х і псыхадэлічнага джазу да раньняй электронікі і авангарду. Завяршэньнем вечарыны стане выступ Intelligency, які падпісаў кантракт зь міжнародным лэйблам Warner Music і чый трэк «August» толькі на Youtube праслухалі 6 млн разоў.
Імёны ўдзельнікаў Intelligency апошнімі днямі былі на вуснах зь іншай прычыны. 19 чэрвеня гітарыст каманды Яўген Мурашка адзначаў абарону магістарскай дысэртацыі ў адным са сталічных бараў. Але трапіць дадому ў той вечар так і ня змог: у раёне пляцу Якуба Коласа, дзе шыхтаваўся «ланцуг салідарнасьці», яго затрымаў АМАП. Рэшту дня музыка правёў у аўтазаку, дзе страціў прытомнасьць і ачуняў толькі ў машыне хуткай дапамогі зь сьлядамі зьбіцьця.
Першая хваля онлайн-вечарынак VELO_ve Music Fest прайшла ўвесну, да яе далучыліся многія папулярныя беларускія выканаўцы і тэатральныя праекты.
Гэтым разам удзел у фэстывалі пацьвердзілі берасьцейскія панкі з «Дай Дарогу!», экспэрымэнтальны фрык-тэатар T(e):Art ды іншыя. Агулам у другім сэзоне адбудзецца восем інтэрактыўных трансьляцыяў.
