У сьнежні 2020 году Мікіта Самарын быў засуджаны на 4 гады «хіміі» за тое, што ў жніўні падчас пратэстаў нібыта распыліў у твар амапаўца газ з балёнчыку. Тады паведамлялася, што ён адбіваў чалавека пры затрыманьні і распыліў газ на невядомага ў цывільным, ня ведаючы, што гэта пераапрануты міліцыянт. Той заявіў, што атрымаў апёк рагавіцы. Праз тры месяцы палітвязьню завочна зрабілі пакараньне больш жорсткім, прысудзіўшы 2,5 гады зьняволеньня. Мікіта Самарын на той суд не зьявіўся: паводле адной інфармацыі, ён зьехаў з краіны, паводле другой - ад таго часу хаваўся ў Беларусі.
А сёлета ў сакавіку праваабаронцам стала вядома, што Мікіту Самарына зноў затрымалі ў Горадні. Паводле міністэрства ўнутраных спраў, мужчыну спынілі для праверкі дакумэнтаў і прапанавалі прайсьці ў пастарунак. Далей ён нібыта аказаў супраціў міліцыянтам.
«Грамадзяніну прапанавалі прайсьці ў тэрытарыяльнае ўпраўленьне для высьвятленьня асобы. Раптам, з ужываньнем падручных сродкаў, ён аказаў вартавым парадку актыўны супраціў, зламаўшы аднаму зь іх руку. Спрабуючы зьбегчы, скокнуў у раку, дзе быў затрыманы», — заяўлялі ў МУС.
Паводле «Гарадзенскай праваабароны» па затрыманьні Мікіту Самарына трымалі ў гарадзенскай турме № 1, у тым ліку тры тыдні ён знаходзіўся ў штрафным ізалятары СІЗА. Ліставаньне і перадачы яму былі забароненыя. Праваабаронцы прызналі яго палітвязьнем.
Да 2020 году ў Гародні Самарын працаваў аўтарэстаўратарам, быў сябрам клюбу рэканструктараў рэтрааўтамабіляў «Вінтаж», удзельнічаў у фотасэсіях і гарадзкіх фэстах.
Форум