Як паведаміла выданьне Рэформ, мужчына кінуўся на палітыка з сьметніцай.
«Здрайца! Хацеў спаліць апазыцыянэраў!», — выгукнуў ён і кінуў сьметніцу ў Паўла Латушку.
Паводле зьвестак выданьня, нападнікам выявіўся 33-гадовы Яўген Казанцаў, які прыехаў па праграме маладых навукоўцаў вучыцца ў SEW. Свае дзеяньні ён патлумачыў тым, што ў яго скончылася віза, і паведаміў, што выгараў і ня змог абараніць навуковую працу. Ён мяркуе, што напад на Латушку дазволіць яму свабодна вярнуцца ў Беларусь.
У інтэрнэце ёсьць згадкі пра Казанцава. У прыватнасьці, у верасьні 2022 году ён даваў інтэрвію тэлеканалу СТВ як магістар гістарычных навук, дасьледчык. Восем гадоў таму СТВ рабіў пра яго матэрыял, як пра чалавека, які «прыдумаў гербы для ўсіх раёнаў Менску». Яўген Казанцаў нарадзіўся ў Менску 5 верасьня 1991 году, вучыўся на гістарычным факультэце БДУ і ў Рэспубліканскім інстытуце вышэйшай школы.
Аляксандар Лукашэнка ў часе выступу на ўрачыстым сходзе да Дня Незалежнасьці 1 ліпеня заявіў, што нібыта менавіта Павал Латушка хацеў сабраць у пасьлявыбарчую ноч у цэнтры Менску штаб Ціханоўскай і спаліць яго, каб ачоліць апазыцыю.
Кіраўнік Народнага антыкрызіснага ўпраўленьня Павел Латушка , камэнтуючы гэтыя выказваньні Аляксандра Лукашэнкі, назваў яго «паталягічным хлусам, які перасягнуў самога сябе».
Павал Латушка, які ў 2020 годзе быў гендырэктарам Купалаўскага тэатру, у адказ заявіў, што адзіным будынкам, які тады ахоўваў КДБ, была адна з «рэзыдэнцый» Лукашэнкі, дзе ён «схаваўся і дрыжэў ад страху».
«Страх не адпускае дыктатара дагэтуль. Хоць мне ўяўляецца, тут не камэнтар гэтаму маналёгу дыктатара варта даваць, а дыягназ ставіць трэба», — напісаў Латушка.
Форум