У прыватнасьці, у Партугаліі, Гішпаніі, Францыі й Італіі тэмпэратура паветра перавысіла 40 градусаў. У шэрагу краін папярэдзілі аб пагрозе экстрэмальнай сьпёкі і пажарнай небясьпекі.
У Францыі, згодна з паведамленьнем Meteo France, высокая тэмпэратура трымаецца ўжо некалькі дзён на большай частцы тэрыторыі краіны. На гэтым тыдні адбудзецца невялікае зьніжэньне тэмпэратуры на захадзе краіны, а ў сераду разам з сьпёкай прагназуюць лякальныя навальніцы ва ўсходняй частцы Францыі.
У мінулыя выходныя праз сьпёку і моцныя ветры пачаліся пажары ў Францыі і Турэччыне. На мінулым тыдні з пажарамі змагаліся ў Грэцыі і вымушаны былі праводзіць эвакуацыю насельніцтва.
Мэтэаслужба Гішпаніі AEMET паведамляла, што на поўдні і паўднёвым захадзе тэмпэратура ў мінулыя выходныя дасягала 44 градусаў. 2 ліпеня максымальная тэмпэратура захоўваецца на большай частцы краіны, потым абяцаюць яе зьніжэньне, але не кардынальнае — да 34-36 градусаў. У гарах магчымыя навальніцы.
У Італіі, паводле Ўсясьветнай мэтэаарганізацыі, сьпёка пад 40 градусаў будзе трымацца да канца тыдня, без дажджоў. Італьянскія мэдыкі паведамілі аб павелічэньні на 10 % выпадках цеплавых удараў па ўсёй краіне. Яны заявілі, што абязводжваньне, цеплавы ўдар і стомленасьць найбольш распаўсюджаныя сярод сталых людзей, хворых на рак і бяздомных асобаў.
Мэтэаслужба Партугаліі IPMA паведаміла, што імавернасьць перавышэньня ў ліпені сярэдняй тэмпэратуры складае ад 40 да 60%, а колькасьць ападкаў будзе ніжэй за норму. 2 ліпеня тэмпэратура паветра ў краіне вагаецца ад 29 да 39 градусаў, але да канца тыдня тэмпэратура крыху спадзе.
У Беларусі апошнія некалькі тыдняў таксама анамальнае надвор’е, а ўлады праз моцны вецер і дажджы ледзь ня кожны дзень абвяшчаюць аранжавы ўзровень небясьпекі. Згодна з паведамленьнем Белгідрамэту, удзень 2 ліпеня на захадзе краіны тэмпэратура падымецца да +30°С. На ўсходзе Беларусі прагназуюць узмацненьне ветру парывамі да 15-18 м/с.
У апошні дні чэрвеня праз моцны вецер ва ўсіх абласьцях Беларусі фіксавалі выпадкі падзеньня дрэў, у выніку чаго некалькі чалавек атрымалі траўмы, пацярпелі аўтамабілі і некалькі жылых і нежылых будынкаў.
Форум