«Гэтая цытата вырваная з кантэксту. У маёй размове з Лукашэнкам мы абмяркоўвалі поўнае і безумоўнае спыненьне агню. Любое абмежаваньне паводзін Кіева залежала ад дзеяньняў Масквы ў адказ. Я ні разу не рабіў камэнтароў наконт вядзеньня Ўкраінай вайны па-за межамі поўнага спыненьня агню», — напісаў Келаг у сацыяльнай сетцы X, даўшы спасылку на артыкул пад загалоўкам «Келаг паабяцаў Лукашэнку „папрацаваць“ над тым, каб УСУ ня білі па РФ».
Раней Лукашэнка заявіў, што абмеркаваў з Келагам магчымасьць перамір’я паміж Украінай і Расеяй. Паводле яго, ён агучыў пазыцыю Ўладзіміра Пуціна, згодна зь якой перамірʼе магчымае пры ўмове спыненьня ўдараў Украіны па тэрыторыі Расеі.
«Час адыходзіць і пачынаць займацца канкрэтнай справай. З гэтых пазыцый ішлі перамовы і аб Украіне ў тым ліку. Яны шмат кажуць пра гэта сёньня — перамір’е, ну, хаця б у паветры. Мы з Уладзімірам Пуціным абмяркоўвалі гэтую праблему раней, гэта ня першы раз падымаецца пытаньне. Пуцін правільна кажа: „Слухайце, мы — за, мы ж ня супраць, мы ж ня хочам, каб па нашых гарадах білі ракеты амэрыканскія, ангельскія, францускія і нямецкія“», — цытуе Лукашэнку БЕЛТА.
Але, паводле Лукашэнкі, Пуцін наконт гэтага мае адно дакладнае патрабаваньне — ён быццам бы згодны на перамірʼе з Украінай пры ўмове спыненьня ўдараў па расейскіх гарадах.
«Вось гэтую пазыцыю давёў да амэрыканцаў. І кажу: і што тут дрэннага? Мы будзем працаваць, кажа (Келаг. — РС), у гэтым кірунку», — цытуе БЕЛТА словы Лукашэнкі.
«Дык працуйце! Гэта будзе добры першы крок да спыненьня гэтай братазабойчай вайны. Але я ня веру ў тое, што яны (на Захадзе) хочуць спыніць гэтую вайну», — дадаў ён.
- Падчас візыту адмысловага пасланца ЗША Кіта Келага да Аляксандра Лукашэнкі 21 чэрвеня ў Беларусі вызвалілі 14 палітвязьняў, сярод іх Сяргей Ціханоўскі, які правёў за кратамі больш за пяць гадоў.
Форум