Польшча з 7 ліпеня аднаўляе кантроль на межах зь Нямеччынай і Літвой.
«Мы лічым, што ўвядзеньне часовага кантролю неабходна, каб зьвесьці да мінімуму некантраляваную плынь мігрантаў праз польска-нямецкую мяжу», — заявіў прэм’ер-міністар Польшчы Дональд Туск 1 ліпеня.
Нямеччына яшчэ ў лютым паведаміла аб падаўжэньні часовага памежнага кантролю на паўгоду.
Крытыка на адрас Літвы і Латвіі
Пра вяртаньне кантролю на мяжу зь Літвой прэм’ер-міністар Польшчы Дональд Туск заявіў адразу пасьля таго, як абвясьціў увядзеньне кантролю і на мяжы зь Нямеччынай.
Туск рэзка адрэагаваў і назваў «хлусьнёй» словы палітыкаў правых і ўльтраправых партый «ПіС» і «Канфэдэрацыі» пра тое, што Нямеччына нібыта рэгулярна «выкідае» мігрантаў на мяжу з Польшчай.
Прэм’ер адзначыў, што знаходзіцца ў штодзённым кантакце з прадстаўнікамі Міністэрства ўнутраных спраў і адміністрацыі, Памежнай варты, войска і паліцыі. Ён прызнаў наяўнасьць праблемы зь нелегальнай іміграцыяй, але назваў дзеяньні сваіх апанэнтаў «выключна брыдкімі», зьвінаваціўшы іх у намеры паказаць карцінку, нібыта Польшчу з Захаду заліваюць нелегальнымі мігрантамі. Ён заявіў, што будзе асобна расьсьледаваць кожны такі выпадак.
«Я асабіста зьвярнуўся да нямецкага ўраду і канцлера Мэрца і заявіў яму, што будзем правяраць кожны выпадак. Зь нямецкага боку таксама ня будзем пускаць нікога, на каго няма адпаведных папераў, або падставы, згодна зь якімі мігранта хочуць перадаць Польшчы, сумнеўныя».
Раней у палітычных матывах распальваньня сытуацыі на мяжы палітыкаў «ПіС» і «Канфэдэрацыі» абвінаваціў міністар унутраных спраў і адміністрацыі Томаш Семоняк.
Паводле яго, сярод тых мігрантаў, якіх нямецкія ўлады прывозяць на польскую мяжу, ёсьць дзьве групы. Першая — мігранты, па якіх існуюць доказы, што першыя крокі ў Эўразьвязе яны зрабілі на тэрыторыі Польшчы і, адпаведна, займацца імі павінна таксама Польшча. Другая група — мігранты, якіх затрымліваюць на нямецкай мяжы і якія ня маюць дакумэнтаў на права жыць у Нямеччыне. Палова такіх асобаў — украінцы і беларусы, — адзначыў Семоняк.
Раней кіраўнік партыі «ПіС» Яраслаў Качыньскі і пакуль яшчэ дзейны прэзыдэнт Анджэй Дуда абвінавацілі ўрад Дональда Туска ў тым, што ён не рэагуе на нібыта рэгулярныя дзеяньні нямецкіх уладаў, якія падвозяць мігрантаў і выкідаюць іх на польскую мяжу.
Заяўляючы пра неабходнасьць умацаваць кантроль на польска-літоўскай мяжы, Дональд Туск паставіў у прыклад польска-беларускую, якая цяпер добра кантралюецца і на якой «98% эфэктыўнасьці затрыманьняў». Ён адзначыў, што паток нелегальных мігрантаў ідзе праз Расею і Беларусь, часта ў Літву, зь якой Польшча мае адкрытую мяжу.
«Польшча вельмі шмат уклала грошай, каб умацаваць мяжу зь Беларусьсю. На жаль, гэта мае не такое вялікае значэньне ва ўмовах, калі латвійска-беларуская і літоўска-беларуская межы кантралююцца ня так добра».
Ён дадаў, што польска-літоўскую мяжу будуць пільнаваць таксама жаўнеры Тэрытарыяльнай абароны і рэгулярнага польскага войска.
Літва накіравала ў Латвію дадатковыя сілы для аховы мяжы зь Беларусьсю
Міністар унутраных спраў Літвы Ўладзіслаў Кандратовіч заявіў, што ўзмацненьне памежнага кантролю зьяўляецца выключна рашэньнем Польшчы.
«Мы праінфармаваныя пра гэта і падтрымліваем цесны кантакт на ўзроўні міністэрства. У сваю чаргу, мы прымаем дадатковыя захады па барацьбе з другаснай нелегальнай міграцыяй з латвійскага боку», — працытавала Кандратовіча агенцтва BNS, паведаміла выданьне LRT.
МУС Літвы на просьбу латвійскага боку накіравала ў суседнюю краіну супрацоўнікаў паліцыі і Службы аховы дзяржаўнай мяжы Літвы.
Паводле міністра, літоўскія памежнікі супольна з паліцыяй і Службай грамадзкай бясьпекі дадаткова праводзяць праверкі на латвійскім і польскім кірунку.
Згодна з афіцыйнай інфармацыяй Службы аховы дзяржаўнай мяжы Літвы, з пачатку году ў Літве затрымалі 352 нелегальных мігрантаў, якія незаконна ўехалі ў Латвію зь Беларусі і потым спрабавалі трапіць у Заходнюю Эўропу, часьцей за ўсё ў Нямеччыну, празь Літву і Польшчу.
Паводле літоўскіх памежнікаў, сёлета паток нелегальнай другаснай міграцыі з Латвіі павялічыўся ў 2,5 разы ў параўнаньні з сытуацыяй у студзені-чэрвені 2024 году, калі затрымалі 140 такіх мігрантаў.
Затрыманыя ў Літве мігранты паведамілі, што яны праз Дубай выяжджаюць у Расею, адтуль — у Беларусь, і потым — у Латвію. Некаторыя паведамлялі, што адразу прыяжджалі ў Беларусь з краін свайго паходжаньня.
У Службе аховы дзяржаўнай мяжы Літвы паведамілі, што нелегальныя мігранты карыстаюцца паслугамі перавозчыкаў і выяжджаюць з Латвіі групамі ад некалькіх чалавек да дзясяткаў, і маюць замежныя або падробленыя праязныя дакумэнты.
Згодна зь інфармацыяй літоўскага боку, з 352 затрыманых сёлета мігрантаў з так званага «латвійскага маршруту» 157 затрымалі на тэрыторыі Літвы і 195 — на тэрыторыі Польшчы. Сярод іх перавозчыкаў — грамадзяне Украіны, Латвіі, Літвы і Малдовы.
Паводле літоўскага боку, сёлета незаконна перасячы мяжу з боку Беларусі з Латвіяй спрабавалі 5 914 мігрантаў, іх затрымалі і вярнулі назад, або не дапусьцілі пераходу мяжы. Гэтая лічба ў 6,7 разы перавышае аналягічныя спробы перасячэньня літоўскай мяжы зь Беларусі — затрымалі 890 незаконных мігрантаў. У Польшчы папярэдзілі 14 975 спробаў незаконна трапіць на польскую тэрыторыю.
У Латвіі пакуль не камэнтуюць
На афіцыйных сайтах памежнікаў і ўраду Латвіі пакуль няма ніякіх новых камэнтароў наконт новай хвалі мігранцкага крызісу.
Апошняе паведамленьне датавана 25 чэрвеня, калі Кабінэт міністраў Латвіі падоўжыў у чатырох рэгіёнах краіны ўзмоцнены рэжым аховы на мяжы зь Беларусьсю да 31 сьнежня з магчымым далейшым працягам у 2026 годзе.
Мігранцкі крызіс на мяжы Беларусі і краін ЭЗ працягваецца зь вясны 2021 году. Улады суседніх эўрапейскіх дзяржаў лічаць яго «гібрыднай атакай», арганізаванай рэжымамі ў Менску і Маскве.
Аляксандар Лукашэнка неаднаразова заяўляў, што беларускія памежнікі ня будуць спыняць нелегальных мігрантаў, якія ідуць у Эўрасаюз празь Беларусь, бо іх туды «паклікалі».
Паводле Памежнага камітэту Беларусі, з 2021 году на мяжы з Эўразьвязам загінулі 74 ўцекачы. Паводле дакладу гуманітарных арганізацыі, паводле стану на сакавік 2024 году было вядома 116 пацьверджаных выпадкаў сьмерці мігрантаў, якія ішлі зь Беларусі, і з таго часу гэтая лічба вырасла. Толькі за травень беларускія памежнікі паведамілі пра 6 памерлых мігрантаў.
Форум