«У часе дацкага старшынёўства прыярытэт будзе надавацца барацьбе зь нелегальнай міграцыяй і забесьпячэньню эфэктыўнага кантролю за зьнешнімі межамі ЭЗ. Старшынёўства будзе падтрымліваць сталыя намаганьні па вызначэньні новых і эфэктыўных падыходаў да кіраваньня нелегальнай міграцыяй», — адзначаецца ў дакумэнце.
Сярод задач, вызначаных краінай, — стварэньне больш моцнага і ўстойлівага ЭЗ, які бярэ на сябе большую адказнасьць за ўласную бясьпеку, умацаваньне ўнутранай бясьпекі і ўстойлівасьці Эўразьвязу, каб аб’яднаньне было лепш падрыхтаванае да барацьбы зь цяперашнімі і будучымі крызісамі, катастрофамі і іншымі пагрозамі бясьпецы.
«Эўрапейская абаронная прамысловасьць павінна быць умацаваная. Палітычная, вайсковая, эканамічная і грамадзянская падтрымка Ўкраіны, а таксама палітыка ЭЗ па падтрыманьні ціску на Расею, у тым ліку праз санкцыі, павінны працягвацца», — адзначаецца ў праграме старшынёўства Даніі.
Апроч таго, краіна лічыць далейшае пашырэньне ЭЗ «геапалітычнай неабходнасьцю», таму «дацкае старшынёўства будзе амбіцыйна працаваць над садзейнічаньнем пашырэньню ЭЗ».
«Адпаведна, дацкае старшынёўства будзе прасоўваць перамовы аб пашырэньні з Украінай, Малдовай і Заходнімі Балканамі. Пашырэньне цесна зьвязана з намаганьнямі па падтрыманьні фундамэнтальных каштоўнасьцяў ЭЗ — дэмакратыі і вяршэнства закону», — адзначаецца ў дакумэнце.
Данія таксама плянуе «працаваць над умацаваньнем і паглыбленьнем дачыненьняў ЭЗ зь Вялікай Брытаніяй і іншымі заходнеэўрапейскімі краінамі, якія не ўваходзяць у Эўразьвяз».
Асобна ў праграме згадалі аб асаблівай увазе да мабілізацыі фінансаваньня для больш моцнай эўрапейскай абароны, што ўключае прасоўваньне пляну «Пераўзброіць Эўропу» і фінансавую падтрымку Ўкраіны з улікам доўгатэрміновага аднаўленьня краіны на тле поўнамаштабнага расейскага ўварваньня.
Старшынёўства Даніі пачалося 1 ліпеня і прадоўжыцца да 31 сьнежня 2025 году.
Форум