Украінскія дроны атакавалі расейскі завод за 1200 км ад мяжы, ёсьць ахвяры і разбурэньні

Як мінімум два дроны пацэлілі ў корпус заводу, усчаўся пажар. Пра гэта паведаміла Ўкраінская служба Радыё Свабода з спасылкай на крыніцу ў Службе бясьпекі Ўкраіны.

3 чалавекі загінулі і 35 параненыя, паведаміў кіраўнік Удмуртыі Аляксандар Брачалаў.

«Купал» — буйное прадпрыемства расейскага вайскова-прамысловага комплексу, якое выпускае зенітна-ракетныя комплексы «Тор-М2Е» і ўдарныя бесьпілётнікі «Гарпія-А1», а таксама, паводле некаторых зьвестак, дроны тыпу «Шахед».

Выбухі ў Саратаве, Энгельсе. Прыпыненьне працы аэрапортаў

У ноч на 1 ліпеня жыхары расейскіх гарадоў Саратаў і Энгельс паведамлялі пра выбухі. Губэрнатар Саратаўскай вобласьці заявіў пра «пагрозу БПЛА».

Паводле зьвестак Расавіяцыі, аэрапорты Саратава, Казані, Ульянаўску і Ніжнякамску прыпынялі працу.

Непадалёк ад Энгельса месьціцца вайсковы аэрадром «Энгельс-2», дзе базуюцца стратэгічныя бамбавікі. У Ніжнякамску разьмешчаны буйны нафтаперапрацоўчы завод «Танека», а ў суседняй Елабузе, як мяркуецца, зьбіраюцца расейскія «Шахеды».

Гэтыя абʼекты неаднаразова былі атакаваныя раней.

ГЛЯДЗІЦЕ ТАКСАМА:

Ва Ўкраіне загінулі чацьвёра грамадзян Беларусі, якія ваявалі на баку Расеі. Яшчэ адзін здаўся ва ўкраінскі палон

Уначы перакрывалі Керчанскі мост

Уначы 1 ліпеня расейскія ўлады перакрывалі рух па Керчанскім мосьце, які злучае анэксаваны Крым з Расеяй. У тэлеграм-каналах распаўсюджваліся паведамленьні пра магчымую атаку. Паводле непацьверджанай інфармацыі, цэлямі атакі маглі быць зэнітна-ракетныя комплексы С-300/С-400 і радыёлякацыйная станцыя недалёка ў Крыме.

У Данецку атакавалі вайсковы штаб і мэталюргічны завод

Прызначаны расейскімі ўладамі кіраўнік «ДНР» Дзяніс Пушылін заявіў пра ракетны ўдар па Данецку, у выніку якога загінула жанчына і тры чалавекі былі параненыя. Выбухі былі чутныя і ў Луганску. Расейскі бок паведаміў, што на тэрыторыю нафтабазы ўпалі абломкі дрона, а ўзгараньне было ліквідавана.

Расея працягвала ўдары па ўкраінскіх гарадах

Расейскія войскі раніцай 1 ліпеня нанесьлі ракетны ўдар па Каменскім раёне Днепрапятроўскай вобласьці. Ёсьць загінулыя і параненыя.

Таксама расейскія ўдарныя дроны атакавалі Запарожжа і Запароскі раён. У выніку чатырох удараў пашкоджана прадпрыемства і дамы, узьнік пажар.

У аўторак расейскія войскі гадзіну абстрэльвалі жылыя раёны гораду Канстанцінаўка на Данеччыне. Трое чалавек пацярпелі. Пашкоджаны будынкі, крамы і газаправод.

ГЛЯДЗІЦЕ ТАКСАМА:

У Расеі ўдасканалілі дроны «Шахед» пры дапамозе кітайскіх тэхналёгіяў. Акцэнт — супрацьдзеяньне РЭБ і разбурэньні