У Грузіі адправілі ў турму яшчэ аднаго пратэстоўца. У залі адбылася сутычка

У Тбіліскім гарадзкім судзе вынесьлі вырак 21-гадоваму студэнту-мэдыку Георгію Міндадзэ. Яго асудзілі да пяці гадоў пазбаўленьня волі. Студэнта абвінавацілі ў нападзе на супрацоўніка паліцыі ў час праэўрапейскага мітынгу ў Тбілісі, паведамляе праект «Эхо Кавказа».

Пацярпелым у справе праходзіў інспэктар Шмагі Джачвадзэ. На адным з судовых паседжэньняў ён заявіў, што асколак піратэхнічнага зараду трапіў яму ў нагу, у выніку чаго ён атрымаў апёкі. Паводле яго слоў, «чалавек, які запусьціў піратэхніку ў вадамёт», знаходзіўся ў зале суду, на лаве падсудных.

Перад пачаткам слуханьняў у Тбіліскім гарадзкім судзе паміж грамадзянамі, якія прыйшлі падтрымаць абвінавачанага, і судовымі выканаўцамі ўсчалася бойка.

Паседжаньне ў апошні момант перанесьлі ў невялікую залю, разьлічаную прыкладна на 25 чалавек. Гэта выклікала абурэньне ў сямейнікаў Міндадзэ, пратэстоўцаў і іншых грамадзян, якія не змаглі патрапіць у залю.

Пратэстоўцы патрабавалі перанесьці паседжаньне ў залю, даступную для ўсіх, але судзьдзя Ніно Галусташвілі адхіліла просьбу адвакатаў і працягнула слуханьні ў невялікай залі.

У вэстыбюлі залі суду пачалася цісканіна, пасьля чаго служба судовых прыставаў выпхнула частку пратэстоўцаў з будынку, уваход у залю быў заблякаваны, а перамяшчэньне грамадзян унутры суду абмежавана. Да ўваходу ў будынак і ва ўнутраным дворыку быў разьмешчаны нарад паліцыі.

У выніку ў вэстыбюлі жанчыне спатрэбілася мэдыцынская дапамога. Пазьней у клініку даставілі грамадзкага дзеяча Ладо Джахуу. Паводле відавочцаў, на яго напалі судовыя прыставы. Верагодна, у яго зламаны нос.

Георгію Міндадзэ выставілі абвінавачаньне па артыкуле «напад на супрацоўніка паліцыі». Паводле сьледзтва, 29 лістапада 2024 году ў час адной з масавых акцыяў у Тбілісі ён нібыта выкарыстаў піратэхнічную прыладу, якая нібыта трапіла ў супрацоўніка паліцыі і пашкодзіла яму нагу. У якасьці доказаў пракуратура прадставіла фатаграфію Міндадзэ, на якой ён трымае піратэхнічную прыладу, і паказаньні аднаго з супрацоўнікаў паліцыі.

24 чэрвеня ў Грузіі да турэмнага зьняволеньня асудзілі лідэраў трох апазыцыйных партый. Заснавальнікі партыі «Лело — Моцная Грузія» Мамука Хазарадзэ і Бадры Джапарыдзэ правядуць у зьняволеньні па 8 месяцаў, а заснавальнік партыі «Гірчы» Зураб Джапарыдзэ — сем месяцаў. Усім апазыцыянэрам суд на два гады забараніў займаць дзяржаўныя пасады.

Асуджаныя апазыцыйныя палітыкі не прызналі сваёй віны і назвалі перасьлед палітычным.