Савет міністраў Беларусі падрыхтаваў зьмены ў падатках для тых, хто атрымлівае даход з асабістай падсобнай гаспадаркі. Праект закону апублікаваны на Нацыянальным прававым інтэрнэт-партале.
Цяпер у Беларусі тыя, хто атрымлівае прыбытак з асабістай падсобнай гаспадаркі, ня плацяць падатак з продажу атрыманай там прадукцыі. Па ўсёй краіне людзі проста прадаюць садавіну і гародніну са сваіх гародаў пры дарогах ці на рынках.
Паводле ж новай вэрсіі закону, калі падчас праверкі падатковымі органамі высьветліцца, што даход чалавека з уласнага агароду за год перавышае 200 базавых велічыняў (або 8400 рублёў), то ўладальніку прысядзібнай гаспадаркі трэба будзе заплаціць падатак у памеры 10%.
Паводле праекту закону, ад выплаты гэтага падатку могуць вызваліць пры прад’яўленьні дакумэнтаў, якія пацьвярджаюць «магчымасьць і рэальнасьць» атрыманьня даходаў у названым у праекце памеры.
Да такіх дакумэнтаў адносяцца даведка аб вядзеньні асабістай падсобнай гаспадаркі, якую могуць выдаць мясцовыя ўлады, а таксама паперы, якія пацьвярджаюць продаж вырашчанай на прысядзібным участку прадукцыі нарыхтоўчым арганізацыям або на рынку.
ГЛЯДЗІЦЕ ТАКСАМА: Савет Рэспублікі ўхваліў зьмены, якія тычацца заробку індывідуальных прадпрымальнікаў