Што пагражае Ціханоўскаму? Фейгін — пра ўгоду з Трампам, першыя крокі Ціханоўскага і новыя вызваленьні

Пра гэта ды іншае Ганна Соўсь гутарыць у жывым эфіры а 16 гадзіне паводле менскага часу з расейскім палітыкам, праваабаронцам, адвакатам і блогерам Маркам Фейгіным.

Глядзіце размову на відэа цалкам

Тут фрагмэнты гутаркі

— Сяргей Ціханоўскі расказваў у інтэрвію, што яшчэ не прайшоў мэдычны агляд, і што ён працягвае губляць вагу, што яму калолі розныя прэпараты перад тым, як яго вывезьлі зь Беларусі. Вы былі адвакатам у розных гучных палітычна матываваных справах украінскай лётчыцы Надзеі Саўчанкі, лідэра крымскіх татараў Мустафы Джамілёва, расейскага журналіста Аркадзія Бабчанкі. Мэтады працы спэцслужбаў Расеі і Беларусі вельмі падобныя. Якія рызыкі вы бачыце для Сяргея Ціханоўскага?

— Ну, я не мэдык, вядома. Але тое, як ён выглядае... Ён сам кажа: «Магчыма, мяне атруцілі». Ён жа ня ведае, ён таксама ня мэдык. Мала што яму ўводзілі і як гэта ўплывае на арганізм. Яго трэба абавязкова абсьледаваць. Любое шкоднае рэчыва, якое яму маглі ўвесьці, трэба праверыць. Гэта не выключана, бо яму маглі нешта ўвесьці і ў нейкі момант можа адбыцца як з Навальным: — і ваніты з рота...

Ці могуць яны выкарыстоўваць праз уколы назапашвальны эфэкт, каб стварыць умовы, калі палітвязень можа памерці, а можа і не памерці, а можа быць пастаянна на мяжы жыцьця і сьмерці? Канешне, могуць. А чаму ім гэтага не рабіць? Што ім перашкодзіць? Мэдыкі павінны сур’ёзна праверыць стан Ціханоўскага — ці былі нейкія ўмяшаньні на клеткавым узроўні. Я ў гэтым нічога не разумею, не магу адказаць на гэтае пытаньне. Але тое, што гэта звычайная практыка спэцслужбаў — у гэтым няма сумневаў...

У нас унутры расейскай апазыцыі ідзе дыскусія, як забівалі Навальнага. Я вось з Ільлём Яшыным сустракаўся, мы гэта ўсё абмяркоўвалі пасьля яго вызваленьня. У яго свая вэрсія — ён лічыць, што Навальнага проста аднаразова атруцілі і забілі. Хтосьці лічыць, што маглі ўводзіць нешта праз ежу ці нутравенна. Мы ўсяго ня ведаем, але галоўнае — стварыць пагрозу арганізму такой ступені, каб можна было кіраваць жыцьцём чалавека ў любы момант.

Гэта звычайная практыка, яны лічаць яе эфэктыўнай. Чалавек цалкам пад іх кантролем, яны могуць пісаць любыя даведкі ў мэддакумэнтах і казаць: «Ды не, гэта ўсё выдумкі, ніхто яго не труціў». Адказ на гэта можа даць толькі глыбокае мэдыцынскае абсьледаваньне.

Ёсьць рэчывы, што раствараюцца, ёсьць тыя, што разбураюць унутраныя органы, не пакідаючы сьлядоў. Напрыклад, пячонка — цыроз. А які цыроз, калі ён да алькаголю ня мае доступу? Аказваецца, гэта былі рэчывы, яны вымыліся, а пячонка ўжо не тая. Тут мэдыцынскія аспэкты. Але што тычыцца гатоўнасьці беларускіх спэцслужбаў ці пэнітэнцыярнай сыстэмы забіваць чалавека — у гэтым не павінна быць ніякіх сумневаў. І ў Расеі, і ў Беларусі гэта адбываецца лёгка. Я бачу толькі тое, што бачу. Ціханоўскі худы, выцьвілы колер твару і г. д. Але гэта — пытаньне да мэдыкаў.