Як гаворыцца ў паведамленьні міністэрства, 27 чэрвеня расейскія паліцыянты правялі рэйды, «падчас якіх былі жорстка забітыя два азэрбайджанцы, некалькі чалавек атрымалі цяжкія цялесныя пашкоджаньні, дзевяць чалавек арыштаваныя».
«Было даведзена наша чаканьне расьсьледаваньня пытаньня, хуткага прыцягненьня да крымінальнай адказнасьці ўсіх асобаў, якія ўчынілі гвалт», — сказана ў прэс-рэлізе замежнапалітычнага ведамства.
Прадстаўнік МЗС Расеі Марыя Захарава паведаміла, што затрыманьні ў Екацерынбурзе праводзілі ў рамках крымінальных справаў. Дыпляматка ўдакладніла, што падазроныя зьяўляюцца грамадзянамі Расеі.
Запрошаны 28 чэрвеня ў МЗС Азэрбайджану Валакавых даў неабходныя тлумачэньні азэрбайджанскаму боку і запэўніў, што сытуацыя знаходзіцца пад кантролем праваахоўных органаў, сказала Захарава.
У прэс-службах рэгіянальных структураў Сьледчага камітэту і МУС РФ у Сьвярдлоўскай вобласьці РБК паведамілі аб «правядзеньні комплексу захадаў у рамках расьсьледаваньня крымінальных справаў аб злачынствах мінулых гадоў». У падазраваных прайшлі ператрусы.
Расейскае выданьне Е1 піша, што ў пятніцу ў Екацерынбурзе былі затрыманыя каля 50 азэрбайджанцаў. Адзін чалавек памёр, калі да яго ўварваліся паліцыянты.
«Яму стала дрэнна, ён схапіўся за сэрца. Выклікалі хуткую, аказалі дапамогу, спрабавалі апрытомніць, але выратаваць не ўдалося. Ён ужо немалады быў», — расказаў выданьню знаёмы загінулага.
Паводле Е1, загінулы быў адным з братоў Сафаравых, уладальнікаў кавярні «Касьпій». Сьцьвярджаецца, што іх падазраюць у забойстве прадпрымальніка ў траўні 2001 году каля кавярні. Тады дачыненьне Сафаравых не ўдалося ўстанавіць.
ГЛЯДЗІЦЕ ТАКСАМА: Азэрбайджан зьбірае доказы для падрыхтоўкі пазову ў міжнародны суд у сувязі з крушэньнем самалёта ў Актаў, — СМІ