28 чэрвеня, паводле зьвестак Службы аховы дзяржаўнай мяжы Літвы, у краіну спрабавалі прабрацца 18 мігрантаў, піша інфармацыйнае агенцтва «Позірк».
З пачатку месяца зафіксавана 90 спробаў незаконнага пераходу мяжы з боку Беларусі. Гэта ў 2,4 раза менш, чым за 28 дзён траўня 2025 году, і ў 2,5 раза больш, чым за 28 дзён чэрвеня 2024 году.
Сёлета з пачатку году літоўскія службы перадухілілі 890 спробаў парушэньня мяжы з боку Беларусі — у 3,5 раза больш, чым за той жа пэрыяд 2024-га.
Латвія 28 чэрвеня спыніла 69 спробаў, з пачатку месяца — 1510 (у 1,3 раза менш, чым за 28 дзён траўня; у 3,8 раза больш, чым за 28 дзён чэрвеня 2024-га), з пачатку году — 5748 (у 2,3 раза больш, чым за аналягічны леташні пэрыяд; на 8,1% больш, чым за ўвесь 2024 год).
Польшча з пачатку месяца (без уліку 28 чэрвеня, зьвесткі пра гэты дзень зьявяцца пазьней) спыніла 4034 такія спробы, з пачатку 2025 году — 14 265.
Агулам з пачатку чэрвеня суседнія краіны ЭЗ перадухілілі 5634 спробы незаконнага пранікненьня зь Беларусі (у 1,4 раза больш, чым з пачатку чэрвеня 2024-га), з пачатку году — 20 903 (–8,6%).
- Міграцыйны крызіс на мяжы Беларусі і краін ЭЗ працягваецца зь вясны 2021 году. Улады суседніх эўрапейскіх дзяржаваў лічаць яго «гібрыднай атакай», арганізаванай рэжымамі ў Менску і Маскве.
- Аляксандр Лукашэнка ня раз заяўляў, што беларускія памежнікі ня будуць спыняць мігрантаў, якія ідуць у ЭЗ празь Беларусь, бо іх туды «паклікалі».