Як адзначае агенцтва Reuters, ЛГБТ-прайд, які перарос у масавую антыўрадавую дэманстрацыю, стаў адной з найбуйнейшых апазыцыйных акцыяў у краіне.
Арганізатары расказалі, што на акцыю прыйшла рэкордная колькасьць людзей. Паводле іх ацэнак, удзел прынялі ад 180 да 200 тысяч чалавек. Сьцьвярджаюць, што на марш прыехалі людзі з 30 краін, у тым ліку 70 дэпутатаў Эўрапейскага парлямэнту.
Сярод удзельнікаў маршу былі студэнты, семʼі і жыхары сельскай мясцовасьці, якія заявілі, што ніколі раней не хадзілі на мітынгі. На адным з плякатаў, якія несьлі ўдзельнікі акцыі, было напісана: «Ніхто з нас ня вольны, пакуль усе ня вольныя».
Раней у гэтым месяцы паліцыя абʼявіла, што выканае распараджэньне ўраду і забароніць шэсьце. Мэр Будапэшту Гергей Карачань паспрабаваў абысьці закон, заявіўшы, што марш пройдзе як муніцыпальная акцыя, якая, паводле яго, не вымагае дазволу.
«На гэты раз мішэньню сталі сэксуальныя меншасьці. Мы лічым, што не павінна быць грамадзянаў першага і другога гатунку, таму мы вырашылі падтрымаць гэтую акцыю», — заявіў Карачань.
Паведамляюць, што невялікія групы ўльтраправых праціўнікаў ЛГБТ-прайду паспрабавалі сарваць шэсьце, але паліцыя разагнала іх і зьмяніла маршрут, каб унікнуць якіх-небудзь сутыкненьняў.
- У сакавіку 2025 году парлямэнт Вугоршчыны ўхваліў законапраект, які забараняе праводзіць у Будапэшце штогадовы ЛГБТ-прайд. Законапраект быў прапанаваны кіроўнай кааліцыяй, ён унёс папраўкі ў вугорскі закон аб сходах і забараніў праводзіць або наведваць захады, якія парушаюць акт аб «абароне дзяцей». Улады таксама змогуць ідэнтыфікаваць удзельнікаў гэтых акцыяў з дапамогай сыстэмы распазнаваньня асобаў. За парушэньне закону прадугледжаны штраф.
- Урад Віктара Орбана прыняў акт аб «абароне дзяцей» у 2021 годзе. У ім гаворыцца аб неабходнасьці на дзяржаўным узроўні адстойваць традыцыйныя сямейныя каштоўнасьці і, у прыватнасьці, не дапускаць на публічным узроўні распаўсюджваньня інфармацыі аб гомасэксуальнасьці, бісэксуальнасьці і трансгендэрнасьці.
Форум