Падаражэюць некаторыя крэдыты
Нацыянальны банк павялічыў максымальны адсотак на крэдыты для насельніцтва. Ідзецца пра разьліковыя велічыні стандартнай рызыкі. Так, новыя крэдыты ў беларускіх рублях для фізычных асобаў у ліпені (за выключэньнем ільготных) будуць даваць пад 19,10% гадавых (раней 18,18%). Ад гэтага паказьніку залежаць стаўкі на некаторыя банкаўскія пазыкі, у тым ліку на нерухомасьць.
Таксама Нацыянальны банк з 25 чэрвеня павысіць стаўку рэфінансаваньня да 9,75% гадавых (цяпер яна складае 9,5%). Да яе прывязаныя адсоткі на некаторыя крэдыты, у першую чаргу жыльлёвыя.
Рахункі для выплаты пэнсіяў і дапамогі на дзяцей
Да 1 ліпеня беларусы, якія атрымліваюць пэнсіі праз банкі, мусілі завесьці адмысловыя рахункі, якія называюцца базавымі разьліковымі. На іх і будуць пералічваць грошы.
Базавы рахунак сваімі функцыямі не адрозьніваецца ад бягучага. Але ён прадугледжвае сьпіс апэрацыяў, зь якіх банкі не бяруць камісіі. Да прыкладу, гэта адкрыцьцё і закрыцьцё такога рахунку, залічэньне на яго сацыяльных выплата (пэнсіяў, дапамогі на дзяцей, выплатаў беспрацоўным, стыпэндыяў і інш.), пераказы паміж такімі рахункамі, зьняцьце гатоўкі ў банкаматах і касах гэтага ж банку, разьлік за тавары.
Базавы рахунак можна перавесьці з аднаго банку ў іншы — але не часьцей за два разы на каляндарны год. Пераход можа заняць да двух месяцаў. Цягам гэтага часу банк, зь якога адыходзіць кліент, будзе бясплатна пераводзіць грошы ў новую абраную ім установу.
Абнаўленьне рахункаў ЖКГ
У чэрвені ўлады паднялі тарыфы на некаторыя жыльлёва-камунальныя паслугі. Гэта закранула ў тым ліку ацяпленьне, гарачую ваду і электрычнасьць для падагрэву жыльля.
У ліпені беларусы атрымаюць рахункі за некаторыя камунальныя паслугі па павышаных тарыфах.
Навіна для кампаніяў і прадпрымальнікаў
Ад 1 ліпеня кампаніі і індывідуальныя прадпрымальнікі, якія прадаюць тавар з абавязковым маркаваньнем, мусяць выкарыстоўваць адмысловыя касавыя апараты або іх альтэрнатыву — праграмныя касы.
Таксама ад гэтага дня кампаніі, якія выконваюць работы ці аказваюць паслугі на выезьдзе ў сельскай мясцовасьці, абавяжуць прымаць гатоўку праз касавае абсталяваньне і аплатныя тэрміналы. Гэта ж датычыць і тых, хто прапануе бытавыя паслугі.
Мяняецца парадак аплаты пакупак у касах
Ад 1 ліпеня пакупнікі, якія расплачваюцца за тавары ў касах самаабслугоўваньня, абавязаныя счытваць коды маркаваньня з пэўных тавараў — у дадатак да звычайных штрыхкодаў. Гэта коды Data Matrix — яны падобныя на QR-коды. Зь іх дапамогай краіны ЭАЭС, куды ўваходзіць і Беларусь, змагаюцца з падробленымі таварамі.
У Беларусі падобныя коды пакуль зьмяшчаюць на некаторыя малочныя прадукты, воды, сокі, масла, піва, вітаміны, кансэрвы і іншыя тавары.
Разабрацца з навацыяй у крамах дапамогуць кансультанты. У выпадку цяжкасьцяў заплаціць можна ў звычайнай касе з касірам.
Выплаты матэрыяльнай дапамогі да школы
Ад 1 ліпеня дзяржаўныя органы пачнуць прымаць заявы на аднаразовую выплату матэрыяльнай дапамогі да школы. Грошы могуць атрымаць сем’і з трыма і больш дзецьмі да 18 гадоў, даход значэньня ня мае.
Матэрыяльная дапамога складзе 30% ад бюджэту пражытковага мінімуму на кожнае дзіця-школьніка.
Для атрыманьня выплаты трэба зьвяртацца ў органы сацыяльнай абароны на месцы жыхарства, у Менску і некаторых раёнах Берасьцейскай, Віцебскай, Горадзенскай вобласьцяў — на месцы вучобы дзіцяці.
Тэрміналы «Белпошты» больш ня будуць прымаць картак
«Белпошта» аб’явіла аб зьмене правілаў аплаты ў сваіх платна-даведачных тэрміналах. Ад 1 ліпеня 2025 году ўсе такія прылады будуць працаваць толькі з гатоўкай. Расплаціцца карткай праз тэрмінал больш ня ўдасца.
Прычыны адмовы ад безгатоўкавай аплаты ў тэрміналах у «Белпошце» не назвалі.
Дагэтуль тэрміналы «Белпошты» дазвалялі аплочваць паслугі як гатоўкаю, так і банкаўскімі карткамі. Цяпер картку прымуць толькі ў апэрацыйным акне паштовага аддзяленьня.
Новыя абавязкі інтэрнэт-крамаў
Ад 11 ліпеня беларускія гандлёвыя пляцоўкі ў інтэрнэце абавязаныя адказваць на электронныя звароты пакупнікоў. Акрамя таго, з гэтай даты інтэрнэт-крамы павінны даваць пакупнікам магчымасьць запаўняць лічбавую форму замовы.
Дзякуючы такой навацыі чалавек зможа праверыць замову і выправіць магчымыя памылкі да завяршэньня афармленьня пакупкі, піша Blizko.
Акрамя таго, уладальнік інтэрнэт-пляцоўкі з 11 ліпеня павінен выдаваць пакупніку пацьверджаньне аб заключэньні дамовы.
Мяняюцца законы аб рэкляме
Канкрэтызуюцца патрабаваньні да вонкавай рэклямы на помніках архітэктуры і гісторыка-культурных каштоўнасьцях. Рэкляма павінна разьмяшчацца асобнымі літарамі альбо кансольлю, ня большай за 70×70×30 см.
Таксама ўнармоўваецца рэкляма на паўкруглых частках вітрынаў, вокнаў і дзьвярэй. Дэталі тут.
Дазвол паляваць на мядзьведзя
Ужо 1 ліпеня ў Беларусі адкрыецца паляваньне на мядзьведзя, паведамляюць у Міністэрстве лясной гаспадаркі. Там зазначылі, што гэта адбудзецца ўпершыню ў гісторыі сувэрэннай Беларусі.
«Адкрыцьцё паляваньня на мядзьведзя зьвязанае з рэзкім ростам яго колькасьці і з мэтай выключэньня канфліктных сытуацыяў паміж зьверам і насельніцтвам», — падкрэсьлілі ў ведамстве.
Паляваньне адкрыецца з 1 ліпеня па 31 сьнежня. Дазваляецца паляваньне са стрэльбай на мядзьведзя любога полу і ўзросту. Паляваць можна на працягу содняў з засады, з падыходу ў прысутнасьці кіраўніка паляваньня. Пры гэтым можна выкарыстоўваць:
- наразную паляўнічую зброю; пералік патронаў (калібраў), дазволеных для здабычы мядзьведзя, вызначаны пастановай Міністэрства лясной гаспадаркі Рэспублікі Беларусь ад 20 лютага 2025 г. № 3;
- гладкаствольная паляўнічая зброя, ня меншая за 16-ы калібр, з выкарыстаньнем патронаў, забясьпечаных куляй;
- паляўнічых сабак: пароды адпаведна рашэньню карыстальніка абшару паляваньня.
Да ўдзелу ў паляваньні на мядзьведзя дапускаюцца паляўнічыя з стажам паляваньня, ня меншым за тры гады.
Падаражэюць пэўныя маркі цыгарэт зь фільтрам
Горадзенская тытунёвая фабрыка «Нёман» на 15–20 капеек падыме цэны на некаторыя віды цыгарэт Dove, RIGINS і RB (усяго 6 найменьняў).
ЗТАА «Алідзі-Вест» на 30 капеек падвышае цану чатырох відаў цыгарэт Dunhill.
Іншыя вытворцы і экспартэры тытунёвай прадукцыі цэнаў падымаць ня будуць.
Забараняюць расейскія піцу, бліны і марозіва
Ад 1 ліпеня забаронена ўвозіць і прадаваць у Беларусі такую прадукцыю:
- два гатункі бліноў «Сытый папа» (індыкатар пэўных мікраарганізмаў вышэйшы за норму, знойдзеныя бактэрыі групы кішачных палачак);
- піца «Sибирская коллекция» (прычыны такія самыя);
- двухпластовае марозіва з смакам чарніц і туці-фруці ад «Фабрики Грез» (прычына: вытворца часткова замясьціў 30% малочнага тлушчу яго замяняльнікам).
Форум